from Voyage de Jacques le Saige, de Douai à Rome, Notre-Dame-de-Lorette, Venise ... par Jacques Le Saige, avant 1523

Du Chastel Sainct Jhan a Plaisanche a douze mille et y a beau chemin. Ce est une bonne ville, et de la a Pontenu a cinq mille. C'est une petitte ville comme une bourgade , il y a tenant le porte le millieur logy que on scauroit trouver. Je croy quil y a bien pour loger deux cens chevaulx. C'est ung plaisir de veoir le pays alentour, qui est fort fertil. Et sy voidt on tant de rossignols que que c'est possible de les ouyr chanter. Car il y a largement arbres et sont par rens et les bleds dessoubs. Le païs est chault, car les gens de bien ne portait que robes de soye ou saye, et les moyennes gens robes de toilles perces fronchiés. Principallement les femmes et les enfans que gardent les bestes au champs nont ne bonnet ne chapeaux, et en ay veu que avoient les cheveulx moitié jaune ad cause de la pluie que chiet sur leurs testes. Nous demourasmes au disner audit Pontenu le seizième d'apvril et despendis 9 gros.
De Pontenu à Florensolle a sept mille, c'est une petite bonne ville, ou il y a des beaus logis, et beau païs alentour, plain de bleds et dabres et de vignes ; nul ne croiroit sil ne le voit ; il n'est point de pareil au monde ; dela au bourcq Sainct Denis a huit mille. Il vint deux varlets au devant de nous pour annochier leurs logis , et battirent quasy lung lautre. Il nous voloient bailler ung escutau soleil en cas que ne fussiesmes bien traictiés. En le fait nous teins- mes au varlet de l'angele. Y demourasmes la au gist audit bourcq, et fusmes tres bien traictiés car nous eusmes plus de dix sortes de viandes et despendis 13 gros.
II nous fut dict que le corps Sainct Donny est audit bourcq.